tegh-e-nigah-e-dida-e-KHun-Khaar nikali

teġh-e-nigah-e-dīda-e-ḳhūñ-ḳhār nikālī

kyuuñ aap ne ushshāq pe talvār nikālī

bhūle haiñ ġhazālān-e-haram raah ḳhatā se

tum ne ajab andāz kī raftār nikālī

dhaḌkā mire naale kā rahā murġh-e-sahar ko

āvāz shab-e-vasl na zinhār nikālī

har ghar meñ kahe rakhte haiñ kohrām paḌegā

gar laash hamārī sar-e-bāzār nikālī

āḳhir mirī turbat se ugī hai gul-e-nargis

kyā bād-e-fanā hasrat-e-dīdār nikālī

maiñ vasl kā saa.il huuñ na va.ade kā talab-gār

bātoñ meñ abas aap ne takrār nikālī

jal jā.egā ye ḳhirman-e-hastī abhī ai dil

siine se agar āh-e-sharar-bār nikālī

dil le ke bhī 'ra.anā' kā kiyā paas na afsos

kuchh hasrat-e-dil tū ne na ayyār nikālī

tegh-e-nigah-e-dida-e-KHun-KHar nikali

kyun aap ne ushshaq pe talwar nikali

bhule hain ghazalan-e-haram rah KHata se

tum ne ajab andaz ki raftar nikali

dhaDka mere nale ka raha murgh-e-sahar ko

aawaz shab-e-wasl na zinhaar nikali

har ghar mein kahe rakhte hain kohram paDega

gar lash hamari sar-e-bazar nikali

aaKHir meri turbat se ugi hai gul-e-nargis

kya baad-e-fana hasrat-e-didar nikali

main wasl ka sail hun na wade ka talab-gar

baaton mein abas aap ne takrar nikali

jal jaega ye KHirman-e-hasti abhi ai dil

sine se agar aah-e-sharar-bar nikali

dil le ke bhi 'rana' ka kiya pas na afsos

kuchh hasrat-e-dil tu ne na ayyar nikali