tera apna hun dekh-bhaal mujhe

terā apnā huuñ dekh-bhāl mujhe

kho na jā.ūñ kahīñ sañbhāl mujhe

maiñ chalā to gayā thā duur kahīñ

phir tirā aa gayā ḳhayāl mujhe

maiñ to pahle bhī huuñ musībat meñ

ġham ko sahne meñ hai kamāl mujhe

vo tire saath ab nahīñ hote

log karne lage savāl mujhe

maiñ ne rakkhā azīz-e-jāñ tum ko

dekh mushkil meñ tū na Daal mujhe

maiñ huuñ sūraj tire zamāne kā

dost mumkin nahīñ zavāl mujhe

maiñ tirī dastaras meñ huuñ kab se

vahshat-e-hijr se nikāl mujhe

maar Dālegī ek din 'tanhā'

ye tirī shoḳhī-e-jamāl mujhe

tera apna hun dekh-bhaal mujhe

kho na jaun kahin sanbhaal mujhe

main chala to gaya tha dur kahin

phir tera aa gaya KHayal mujhe

main to pahle bhi hun musibat mein

gham ko sahne mein hai kamal mujhe

wo tere sath ab nahin hote

log karne lage sawal mujhe

main ne rakkha aziz-e-jaan tum ko

dekh mushkil mein tu na Dal mujhe

main hun suraj tere zamane ka

dost mumkin nahin zawal mujhe

main teri dastaras mein hun kab se

wahshat-e-hijr se nikal mujhe

mar Dalegi ek din 'tanha'

ye teri shoKHi-e-jamal mujhe