تیرا اپنا ہوں دیکھ بھال مجھے

تیرا اپنا ہوں دیکھ بھال مجھے

کھو نہ جاؤں کہیں سنبھال مجھے

میں چلا تو گیا تھا دور کہیں

پھر ترا آ گیا خیال مجھے

میں تو پہلے بھی ہوں مصیبت میں

غم کو سہنے میں ہے کمال مجھے

وہ ترے ساتھ اب نہیں ہوتے

لوگ کرنے لگے سوال مجھے

میں نے رکھا عزیز جاں تم کو

دیکھ مشکل میں تو نہ ڈال مجھے

میں ہوں سورج ترے زمانے کا

دوست ممکن نہیں زوال مجھے

میں تری دسترس میں ہوں کب سے

وحشت ہجر سے نکال مجھے

مار ڈالے گی ایک دن تنہاؔ

یہ تری شوخیٔ جمال مجھے