tera chehra dekh ke har shab subh dobara likhti hai

terā chehra dekh ke har shab sub.h dobāra likhtī hai

barg-e-gul par mauj-e-sabā bhī naam tumhārā likhtī hai

chappa chappa merā maazī jis ke dam se raushan hai

apne dil par vo bhī kabhī kyā naam tumhārā likhtī hai

kis kā chehra kis kī āñkheñ dekh ke kaalī lambī raat

soch meñ Duubī chupke chupke chāñd sitāra likhtī hai

be-bas kashtī paḌh letī hai fitrat kī vo bhī tahrīr

mauj-e-balā jab āb-e-ravāñ par koī ishāra likhtī hai

kārobār-e-shauq meñ ab to hālat ye aa pahuñchī hai

sub.h ziyāñ tahrīr kare to shaam ḳhasāra likhtī hai

raat kī kaalī tahrīroñ se tab tak huuñ mahfūz 'nizām'

ek sitāra jab tak ruḳh par sub.h kā taarā likhtī hai

tera chehra dekh ke har shab subh dobara likhti hai

barg-e-gul par mauj-e-saba bhi nam tumhaara likhti hai

chappa chappa mera mazi jis ke dam se raushan hai

apne dil par wo bhi kabhi kya nam tumhaara likhti hai

kis ka chehra kis ki aankhen dekh ke kali lambi raat

soch mein Dubi chupke chupke chand sitara likhti hai

be-bas kashti paDh leti hai fitrat ki wo bhi tahrir

mauj-e-bala jab aab-e-rawan par koi ishaara likhti hai

karobar-e-shauq mein ab to haalat ye aa pahunchi hai

subh ziyan tahrir kare to sham KHasara likhti hai

raat ki kali tahriron se tab tak hun mahfuz 'nizam'

ek sitara jab tak ruKH par subh ka tara likhti hai