tera diwana liye chaak-e-gareban kab se

terā dīvāna liye chāk-e-garebāñ kab se

phir rahā hai tire kūche meñ pareshāñ kab se

qadr kar va.ada-shikan pās-e-vafā kī kuchh to

kar ke baiThā hai koī jashn-e-charāġhāñ kab se

dekh kar jām-ba-kaf mujh ko hai kyoñ ḳhaufzada

maiñ bulātā huuñ tujhe gardish-e-daurāñ kab se

mere hoñToñ pe hañsī dekh ke ḳhush hai duniyā

kaun samjhegā mirā dil hai pareshāñ kab se

tujh ko ehsās bhī kuchh hai ki nahīñ jān-e-chaman

raah takte haiñ tirī ahl-e-gulistāñ kab se

aap bhī kaash samajhte mirī ġhazloñ kī zabāñ

aap kī bazm meñ 'māhir' hai ġhazal-ḳhvāñ kab se

tera diwana liye chaak-e-gareban kab se

phir raha hai tere kuche mein pareshan kab se

qadr kar wada-shikan pas-e-wafa ki kuchh to

kar ke baiTha hai koi jashn-e-charaghan kab se

dekh kar jam-ba-kaf mujh ko hai kyon KHaufzada

main bulata hun tujhe gardish-e-dauran kab se

mere honTon pe hansi dekh ke KHush hai duniya

kaun samjhega mera dil hai pareshan kab se

tujh ko ehsas bhi kuchh hai ki nahin jaan-e-chaman

rah takte hain teri ahl-e-gulistan kab se

aap bhi kash samajhte meri ghazlon ki zaban

aap ki bazm mein 'mahir' hai ghazal-KHwan kab se