تیرا خیال تھا کہ یوں ہی بد گمان تھے

تیرا خیال تھا کہ یوں ہی بد گمان تھے

اپنے بھی کچھ اصول مگر درمیان تھے

شاخیں ہر ایک رات یوں ہی چیختی رہیں

وہ پھول ہی بکے تھے جو زیب دکان تھے

اس نے ازل سے بھینچ کے رکھی تھی مٹھیاں

ہاتھوں کی ہر لکیر کے ہم ترجمان تھے

سوچوں کی موج موج بہا لے گئی انہیں

سانسوں کی گرم ریت پہ جن کے مکان تھے

پورس کے ہاتھیوں کے سبھی گول کٹ گئے

جذبے مرے خلوص کے روشن چٹان تھے

جانے وہ چور آ کے کدھر مڑ گیا بہارؔ

دہلیز تک تو پاؤں کے واضح نشان تھے