tera KHayal tha ki yunhi bad-guman the

terā ḳhayāl thā ki yūñhī bad-gumān the

apne bhī kuchh usuul magar darmiyān the

shāḳheñ har ek raat yūñhī chīḳhtī rahīñ

vo phuul hī bike the jo zeb-e-dukān the

us ne azal se bhīñch ke rakkhī thī muTThiyāñ

hāthoñ kī har lakīr ke ham tarjumān the

sochoñ kī mauj mauj bahā le ga.ī unheñ

sāñsoñ kī garm ret pe jin ke makān the

poras ke hāthiyoñ ke sabhī gol kaT ga.e

jazbe mire ḳhulūs ke raushan chaTān the

jaane vo chor aa ke kidhar muḌ gayā 'bahār'

dahlīz tak to paañv ke vāzeh nishān the

tera KHayal tha ki yunhi bad-guman the

apne bhi kuchh usul magar darmiyan the

shaKHen har ek raat yunhi chiKHti rahin

wo phul hi bike the jo zeb-e-dukan the

us ne azal se bhinch ke rakkhi thi muTThiyan

hathon ki har lakir ke hum tarjuman the

sochon ki mauj mauj baha le gai unhen

sanson ki garm ret pe jin ke makan the

poras ke hathiyon ke sabhi gol kaT gae

jazbe mere KHulus ke raushan chaTan the

jaane wo chor aa ke kidhar muD gaya 'bahaar'

dahliz tak to panw ke wazeh nishan the