tera shewa hai idhar dekh masihai kar

terā sheva hai idhar dekh masīhā.ī kar

zaḳhm phir khulne lage Thiik se turpāī kar

maiñ tujhe dekh nahīñ saktā ye baat aur magar

ik jhalak hī sahī zaa.e.a mirī bīnā.ī kar

terī nisbat se vo ab merī qayādat meñ hai

maiñ ne majnūñ se kahā bhī thā ki aguvā.ī kar

maiñ na kahtā thā nigāheñ na milā dil na gañvā

ab jo ho paa.e to nuqsān kī bharpā.ī kar

qaisiyat sang kī barsāt meñ nahlātī hai

zeb hai tujh ko mirī jaan tū lailā.ī kar

aur maiñ aql ke taabe nahīñ rah saktā ab

aa mire sar meñ samā jā mujhe saudā.ī kar

yūsuf-e-misr kā ḳhāliq bhī milegā tujh ko

ḳhud meñ paidā zarā andāz-e-zuleḳhā.ī kar

tū bhī hañs de kabhī majzūb ke pahnāve par

tū bhī ḳhud ko kisī din merā tamāshā.ī kar

terī furqat mirī shādābī ko khā jā.egī

mujh ko hargiz na asīr-e-ġham-e-tanhā.ī kar

tera shewa hai idhar dekh masihai kar

zaKHm phir khulne lage Thik se turpai kar

main tujhe dekh nahin sakta ye baat aur magar

ek jhalak hi sahi zaea meri binai kar

teri nisbat se wo ab meri qayaadat mein hai

main ne majnun se kaha bhi tha ki aguwai kar

main na kahta tha nigahen na mila dil na ganwa

ab jo ho pae to nuqsan ki bharpai kar

qaisiyat sang ki barsat mein nahlati hai

zeb hai tujh ko meri jaan tu lailai kar

aur main aql ke tabe nahin rah sakta ab

aa mere sar mein sama ja mujhe saudai kar

yusuf-e-misr ka KHaliq bhi milega tujh ko

KHud mein paida zara andaz-e-zuleKHai kar

tu bhi hans de kabhi majzub ke pahnawe par

tu bhi KHud ko kisi din mera tamashai kar

teri furqat meri shadabi ko kha jaegi

mujh ko hargiz na asir-e-gham-e-tanhai kar