tere aasar miTane mein bahut der lagi

tere āsār miTāne meñ bahut der lagī

ḳhud ko is paar bulāne meñ bahut der lagī

tū mirī zaat kā khoyā huā hissa hai koī

tujh ko ye baat batāne meñ bahut der lagī

zindagī jis kī har ik taal pe kartī hai dhamāl

dil ke vo taar bajāne meñ bahut der lagī

ā.īna mujh ko yuuñ dekhe ki simaTtī jā.ūñ

tere rañgoñ ko bahāne meñ bahut der lagī

jis kī ta.abīr meñ be-shakl nikhar jaate haiñ

mujh ko us ḳhvāb ke paane meñ bahut der lagī

raat phir hijr ke takiye pe kiye gesū darāz

raat phir ḳhud ko sulāne meñ bahut der lagī

kitne bikhre hue rañgoñ meñ milī hai furqat

mujh ko ye rizq uThāne meñ bahut der lagī

vasl ke ḳhvāb mirī nasl hī ab dekhegī

hijr meñ rāsta paane meñ bahut der lagī

tere aasar miTane mein bahut der lagi

KHud ko is par bulane mein bahut der lagi

tu meri zat ka khoya hua hissa hai koi

tujh ko ye baat batane mein bahut der lagi

zindagi jis ki har ek tal pe karti hai dhamal

dil ke wo tar bajaane mein bahut der lagi

aaina mujh ko yun dekhe ki simaTti jaun

tere rangon ko bahane mein bahut der lagi

jis ki tabir mein be-shakl nikhar jate hain

mujh ko us KHwab ke pane mein bahut der lagi

raat phir hijr ke takiye pe kiye gesu daraaz

raat phir KHud ko sulane mein bahut der lagi

kitne bikhre hue rangon mein mili hai furqat

mujh ko ye rizq uThane mein bahut der lagi

wasl ke KHwab meri nasl hi ab dekhegi

hijr mein rasta pane mein bahut der lagi