tere bare mein jo afsane sune the itne

tere baare meñ jo afsāne sune the itne

jaisā paayā hai tujhe kab vo bure the itne

shāyad is baar to aa.ī hai ḳhizāñ joban par

pichhlī rut meñ bhī kabhī phuul jhaḌe the itne

aaj kī tarh na thā sāhab-e-zar vo jab tak

us kī rāhoñ meñ sitāre na bichhe the itne

jaise ab paañv har ik gaam pe shal hote haiñ

ham kabhī saañs bhī lene na ruke the itne

us ne aate hī hameñ ġhaur se kyoñ dekhā thā

jab ki milne ko use log khaḌe the itne

tere māthe kī shikan kar ga.ī muhtāt hameñ

raaz varna tire ham par na khule the itne

chārāgar aa.e to pahlī sī muravvat hī na thī

kyā isī din ke liye zaḳhm hare the itne

nā-gavārī thī tirī bazm meñ har chehre par

aaj se pahle ta'alluq na baḌhe the itne

yuuñ to har shaḳhs ne bahrūp badal rakkhā thā

log mā'sūm to pahle na lage the itne

ham ne dekhā thā 'humairā' dam-e-ruḳhsat un ko

kyā vo tere liye bechain hue the itne

tere bare mein jo afsane sune the itne

jaisa paya hai tujhe kab wo bure the itne

shayad is bar to aai hai KHizan joban par

pichhli rut mein bhi kabhi phul jhaDe the itne

aaj ki tarh na tha sahab-e-zar wo jab tak

us ki rahon mein sitare na bichhe the itne

jaise ab panw har ek gam pe shal hote hain

hum kabhi sans bhi lene na ruke the itne

us ne aate hi hamein ghaur se kyon dekha tha

jab ki milne ko use log khaDe the itne

tere mathe ki shikan kar gai muhtat hamein

raaz warna tere hum par na khule the itne

chaaragar aae to pahli si murawwat hi na thi

kya isi din ke liye zaKHm hare the itne

na-gawari thi teri bazm mein har chehre par

aaj se pahle ta'alluq na baDhe the itne

yun to har shaKHs ne bahrup badal rakkha tha

log ma'sum to pahle na lage the itne

hum ne dekha tha 'humaira' dam-e-ruKHsat un ko

kya wo tere liye bechain hue the itne