tere dar par maqam rakhte hain

tere dar par maqām rakhte haiñ

qasd-e-dār-us-salām rakhte haiñ

ibtidā apnī intihā se pare

nā-tamāmī tamām rakhte haiñ

āsmāñ se kise umīd-e-najāt

āshiyāñ zer-e-dām rakhte haiñ

ek yūsuf ki saath ġhurbat meñ

aise lākhoñ ġhulām rakhte haiñ

be-bahā shai huuñ maiñ ki vo mujh ko

nā-ḳharīda ġhulām rakhte haiñ

sab kī sunte haiñ karte haiñ jī kī

kaam se apne kaam rakhte haiñ

vasl-e-ma.ashūq hai sulaimānī

vo hī jam haiñ jo jaam rakhte haiñ

kuchh tirī dostī kī qadr nahīñ

dushmanī ḳhās-o-ām rakhte haiñ

qais o farhād kahte haiñ vo mujhe

kaise gin gin ke naam rakhte haiñ

nāloñ ko rok rok lete haiñ

dil ko ham thaam thaam rakhte haiñ

ka.abe meñ ek dam kī mehmānī

mai-kade meñ mudām rakhte haiñ

dil-rubā kahne se vo chauñk uThe

goyā ham ittihām rakhte haiñ

chashm-e-bad-dūr aish-e-ahd-e-shabāb

sub.h ham-rañg-e-shām rakhte haiñ

ai 'qalaq' baiThiye sar-e-ḳhum-e-mai

aap aalī maqām rakhte haiñ

tere dar par maqam rakhte hain

qasd-e-dar-us-salam rakhte hain

ibtida apni intiha se pare

na-tamami tamam rakhte hain

aasman se kise umid-e-najat

aashiyan zer-e-dam rakhte hain

ek yusuf ki sath ghurbat mein

aise lakhon ghulam rakhte hain

be-baha shai hun main ki wo mujh ko

na-KHarida ghulam rakhte hain

sab ki sunte hain karte hain ji ki

kaam se apne kaam rakhte hain

wasl-e-mashuq hai sulaimani

wo hi jam hain jo jam rakhte hain

kuchh teri dosti ki qadr nahin

dushmani KHas-o-am rakhte hain

qais o farhad kahte hain wo mujhe

kaise gin gin ke nam rakhte hain

nalon ko rok rok lete hain

dil ko hum tham tham rakhte hain

kabe mein ek dam ki mehmani

mai-kade mein mudam rakhte hain

dil-ruba kahne se wo chaunk uThe

goya hum ittiham rakhte hain

chashm-e-bad-dur aish-e-ahd-e-shabab

subh ham-rang-e-sham rakhte hain

ai 'qalaq' baiThiye sar-e-KHum-e-mai

aap aali maqam rakhte hain