تیرے دیوانے کا ہوش میں آنا ٹھیک نہیں

تیرے دیوانے کا ہوش میں آنا ٹھیک نہیں

لوگ وگرنہ سمجھیں گے مے خانہ ٹھیک نہیں

آنکھ ملاؤ خواب سے لیکن اتنا یاد رہے

اک پتھر کا شیشے سے ٹکرانا ٹھیک نہیں

سر میں سودا ہے سودائی دشت کی حد میں رہ

اس حالت میں شہر کی جانب جانا ٹھیک نہیں

دیواروں کا کھڑکی سے یارانہ ہوتا ہے

ان کو اپنے دل کی بات بتانا ٹھیک نہیں

اس کو ہلکے بھاری کا بھی فرق نہیں معلوم

پیمانے کو ٹھیک کرو پیمانہ ٹھیک نہیں

اب تو مشکل مشکل میں ہی ڈالے رکھے گی

کہتا تھا ناں مشکل میں گھبرانا ٹھیک نہیں

ارشدؔ آج وہ پوری تیاری سے آئے گا

دیکھو آج تمہارا باہر جانا ٹھیک نہیں