تیرے دل میں بسے نہیں تھے ہم

تیرے دل میں بسے نہیں تھے ہم

عشق میں کیا کھرے نہیں تھے ہم

کس طرح تیری خیریت ملتی

فیس بک سے جڑے نہیں تھے ہم

خوب روئے لپٹ کے البم سے

تجھ سے تو بولتے نہیں تھے ہم

تو نے خود ہی دیا تھا دل ہم کو

پاؤں تیرے پڑے نہیں تھے ہم

جا کے واپس بھی لوٹ سکتے تھے

غیر کے تو ہوئے نہیں تھے ہم

درد الفت ہوا تھا ہم کو بھی

سنگ کے تو بنے نہیں تھے ہم

آپ جتنا ہمیں سمجھتے تھے

اس قدر بھی برے نہیں تھے ہم

تجھ سے ملنے کی دھن میں عید کے دن

اور کسی سے ملے نہیں تھے ہم

مدتوں اس نے لوٹا قسطوں میں

ایک دن میں لٹے نہیں تھے ہم