tere gham ka tadaruk kiya to hamein sharm aa jaegi aur mar jaenge

tere ġham kā tadāruk kiyā to hameñ sharm aa jā.egī aur mar jā.eñge

ḳhvāb-āvar davā ham ne le lī to phir niiñd ke kizb se zaḳhm bhar jā.eñge

sā.ateñ be-sabātī kī aulād haiñ aur sayyād haiñ is liye aao ham

vaqt ko toḌ deñ varna sab kaam kī rāteñ Dhal jā.eñgī din guzar jā.eñge

tum yūñhī ishq ke zor par ḳhud ko rakkhe raho aur hañste sañvarte raho

dekhnā ek din ham kisī moḌ par apne ham-zād ko zer kar jā.eñge

ranjisheñ dil meñ rakhnā burī baat hai kyuuñ na phir ibtidā se mohabbat kareñ

aao pahle sañvāreñ shab-e-ġham ko ham vaqt hogā to ḳhud bhī sañvar jā.eñge

ye koī baat hai utnī phailī huī zindagī meñ faqat ik tirā intizār

muntazir to tire ham raheñge magar kaise kaise hamāre safar jā.eñge

ajnabī-pan kī lau se nikaltī huī āshnā.ī kī larzāñ tapish aur ham

aisā lagtā hai goyā jhijhakte hue dūsre ḳhvāb meñ phir utar jā.eñge

kār-e-duniyā kareñ kuchh adāvat to ho Tuk tabī.at badalne kī sūrat to ho

ham agar ḳhud se laḌte-jhagaḌte rahe zindagī ke anāsir bikhar jā.eñge

pahle to shahr meñ itne raste na the itnī galiyāñ na thiiñ moḌ itne na the

ham akele khaḌe haiñ pareshān haiñ aur aage baḌhe to kidhar jā.eñge

phir achānak hī ham umr ke nā-tavāñ haath meñ aa.ina dekh kar ro paḌe

aaj tak bas yahī soch kar ḳhush rahe vo bulā.egā ham us ke ghar jā.eñge

tere gham ka tadaruk kiya to hamein sharm aa jaegi aur mar jaenge

KHwab-awar dawa hum ne le li to phir nind ke kizb se zaKHm bhar jaenge

saaten be-sabaati ki aulad hain aur sayyaad hain is liye aao hum

waqt ko toD den warna sab kaam ki raaten Dhal jaengi din guzar jaenge

tum yunhi ishq ke zor par KHud ko rakkhe raho aur hanste sanwarte raho

dekhna ek din hum kisi moD par apne ham-zad ko zer kar jaenge

ranjishen dil mein rakhna buri baat hai kyun na phir ibtida se mohabbat karen

aao pahle sanwaren shab-e-gham ko hum waqt hoga to KHud bhi sanwar jaenge

ye koi baat hai utni phaili hui zindagi mein faqat ek tera intizar

muntazir to tere hum rahenge magar kaise kaise hamare safar jaenge

ajnabi-pan ki lau se nikalti hui aashnai ki larzan tapish aur hum

aisa lagta hai goya jhijhakte hue dusre KHwab mein phir utar jaenge

kar-e-duniya karen kuchh adawat to ho Tuk tabiat badalne ki surat to ho

hum agar KHud se laDte-jhagaDte rahe zindagi ke anasir bikhar jaenge

pahle to shahr mein itne raste na the itni galiyan na thin moD itne na the

hum akele khaDe hain pareshan hain aur aage baDhe to kidhar jaenge

phir achanak hi hum umr ke na-tawan hath mein aaina dekh kar ro paDe

aaj tak bas yahi soch kar KHush rahe wo bulaega hum us ke ghar jaenge