tere ghar ki bhi wahi diwar thi darwaza tha

tere ghar kī bhī vahī dīvār thī darvāza thā

phir vahī bāteñ huiiñ jin kā mujhe andāza thā

sard patthar jāñ-fazā malbūs meñ lipTe hue

haa.e vo duniyā jahāñ chehre na the ġhāza thā

har nafas raushan huā mere lahū ke rañg se

zindagī kyā thī mirā bikhrā huā shīrāza thā

rah ga.ī haiñ ab mire hāthoñ meñ sūkhī patiyāñ

sabr kī tāqat kahāñ thī phuul jab tak taaza thā

sochte rahte the kyuuñ tār-e-nafas kaTtā nahīñ

be-talab jiinā hamāre jurm kā ḳhamyāza thā

jo bulātī thī mujhe sehn-e-gulistāñ kī taraf

phuul kī ḳhushbū nahīñ thī barq kā āvāza thā

jab chaḌhe dariyā pahāḌoñ ko bahā kar le ga.e

Dar rahe the sab magar itnā kise andāza thā

tere ghar ki bhi wahi diwar thi darwaza tha

phir wahi baaten huin jin ka mujhe andaza tha

sard patthar jaan-faza malbus mein lipTe hue

hae wo duniya jahan chehre na the ghaza tha

har nafas raushan hua mere lahu ke rang se

zindagi kya thi mera bikhra hua shiraaza tha

rah gai hain ab mere hathon mein sukhi patiyan

sabr ki taqat kahan thi phul jab tak taza tha

sochte rahte the kyun tar-e-nafas kaTta nahin

be-talab jina hamare jurm ka KHamyaza tha

jo bulati thi mujhe sehn-e-gulistan ki taraf

phul ki KHushbu nahin thi barq ka aawaza tha

jab chaDhe dariya pahaDon ko baha kar le gae

Dar rahe the sab magar itna kise andaza tha