tere husn-o-jamal tak pahuncha

tere husn-o-jamāl tak pahuñchā

maiñ bhī kitne kamāl tak pahuñchā

ba.ad muddat ke zehn-e-āshufta

ek nāzuk-ḳhayāl tak pahuñchā

ai mire shauq-e-be-misāl mujhe

aaj us be-misāl tak pahuñchā

ik zavāl-e-urūj se ho kar

maiñ urūj-e-zavāl tak pahuñchā

zehn āzād ho gayā merā

jab yaqīñ ehtimāl tak pahuñchā

tazkira husn ke tanāsub kā

phir tire ḳhadd-o-ḳhāl tak pahuñchā

ik muamma thā merā mustaqbil

kitnī mushkil se haal tak pahuñchā

is tarah maiñ tire qarīb aayā

jaise mumkin muhāl tak pahuñchā

ye havas bhī kamāl tak pahuñchī

vo badan bhī kamāl tak pahuñchā

ik gila zindagī ke hone kā

hote hote malāl tak pahuñchā

ik ḳhalish sī rahī kahīñ dil meñ

hijr jab bhī visāl tak pahuñchā

thā azal se savāl ke andar

jo javāb ab savāl tak pahuñchā

'shāriq' is ishq ke vasīle se

maiñ jalāl-o-jamāl tak pahuñchā

tere husn-o-jamal tak pahuncha

main bhi kitne kamal tak pahuncha

baad muddat ke zehn-e-ashufta

ek nazuk-KHayal tak pahuncha

ai mere shauq-e-be-misal mujhe

aaj us be-misal tak pahuncha

ek zawal-e-uruj se ho kar

main uruj-e-zawal tak pahuncha

zehn aazad ho gaya mera

jab yaqin ehtimal tak pahuncha

tazkira husn ke tanasub ka

phir tere KHadd-o-KHal tak pahuncha

ek muamma tha mera mustaqbil

kitni mushkil se haal tak pahuncha

is tarah main tere qarib aaya

jaise mumkin muhaal tak pahuncha

ye hawas bhi kamal tak pahunchi

wo badan bhi kamal tak pahuncha

ek gila zindagi ke hone ka

hote hote malal tak pahuncha

ek KHalish si rahi kahin dil mein

hijr jab bhi visal tak pahuncha

tha azal se sawal ke andar

jo jawab ab sawal tak pahuncha

'shaariq' is ishq ke wasile se

main jalal-o-jamal tak pahuncha