tere jalwe se mere dil ka farozan hona

tere jalve se mire dil kā farozāñ honā

ek zarre kā hai ḳhurshīd-ba-dāmāñ honā

jab kisī ġhunche kā muñh chūmtī hai mauj-e-nasīm

yaad aatā hai tire lab kā gulistāñ honā

kis ko fursat hai ki har but kā jigar chaak kare

varna mushkil to na thā kufr kā īmāñ honā

ab kahāñ jā.ūñ ye āshob-e-tamannā le kar

dard ko aa gayā mizrāb-e-rag-e-jāñ honā

saañs lene ko musāfir kī tarah Thahre the

haa.e us sāya-e-dīvār kā zindāñ honā

tere jalwe se mere dil ka farozan hona

ek zarre ka hai KHurshid-ba-daman hona

jab kisi ghunche ka munh chumti hai mauj-e-nasim

yaad aata hai tere lab ka gulistan hona

kis ko fursat hai ki har but ka jigar chaak kare

warna mushkil to na tha kufr ka iman hona

ab kahan jaun ye aashob-e-tamanna le kar

dard ko aa gaya mizrab-e-rag-e-jaan hona

sans lene ko musafir ki tarah Thahre the

hae us saya-e-diwar ka zindan hona