tere kuche mein ja ke bhul gae

tere kūche meñ jā ke bhuul ga.e

ḳhud ko ham yaad aa ke bhuul ga.e

zaḳhm ḳhandāñ haiñ aaj bhī mere

aap to muskurā ke bhuul ga.e

bahs go nāsehoñ ne achchhī kī

mudda.ā saTpaTā ke bhuul ga.e

jo bhulā.e na bhūlte the sitam

sāmne un ko pā ke bhuul ga.e

kaun the kyā the ham kahāñ ke the

jaane kis ko batā ke bhuul ga.e

ham to ḳhair un ko bhūlte the kahāñ

va.ade lekin vafā ke bhuul ga.e

aise bhī kyā alaav bujhte haiñ

dil ko samjhā-bujhā ke bhuul ga.e

haa.e āñkheñ to ham bhī rakhte the

haa.e ham to milā ke bhuul ga.e

bhuul jaatā hai aadmī lekin

aap nazdīk lā ke bhuul ga.e

ishq 'rāhīl' usī ko kahte haiñ

rañj uThā.e uThā ke bhuul ga.e

tere kuche mein ja ke bhul gae

KHud ko hum yaad aa ke bhul gae

zaKHm KHandan hain aaj bhi mere

aap to muskura ke bhul gae

bahs go nasehon ne achchhi ki

muddaa saTpaTa ke bhul gae

jo bhulae na bhulte the sitam

samne un ko pa ke bhul gae

kaun the kya the hum kahan ke the

jaane kis ko bata ke bhul gae

hum to KHair un ko bhulte the kahan

wade lekin wafa ke bhul gae

aise bhi kya alaw bujhte hain

dil ko samjha-bujha ke bhul gae

hae aankhen to hum bhi rakhte the

hae hum to mila ke bhul gae

bhul jata hai aadmi lekin

aap nazdik la ke bhul gae

ishq 'rahil' usi ko kahte hain

ranj uThae uTha ke bhul gae