تیرے لئے کسی سے بغاوت نہ کر سکا

تیرے لئے کسی سے بغاوت نہ کر سکا

شاید میں تجھ سے اتنی محبت نہ کر سکا

مجبور تھا میں اس قدر اپنے مزاج سے

کچھ بھی خلاف عادت و فطرت نہ کر سکا

حق بات پر تو کر لیا دشمن سے اتفاق

نا حق میں دوستوں کی حمایت نہ کر سکا

وہ کام کر دکھایا ہے میرے جنون نے

جو کام تیرا زعم لیاقت نہ کر سکا

عزت کرے گا کیا وہ کسی کے وجود کی

جو شخص اپنے آپ کی عزت نہ کر سکا

لپٹی ہوئی زمیں تھی نگاہوں کی پاؤں سے

سالمؔ تمام عمر میں ہجرت نہ کر سکا