tere ruKH-e-sabih ne rang-e-sahar dikha diya

tere ruḳh-e-sabīh ne rang-e-sahar dikhā diyā

zulmat-e-shab meñ bhī mujhe jiine kā hausla diyā

sehr-e-nazar se aap ke husn-e-bayāñ milā diyā

maiñ ne urūs-e-sher ko kitnā hasīñ banā diyā

mere junūñ kī ḳhāk-e-pā surma-e-dīda-e-ḳhirad

mujh se na pūchh ham-nafas vaqt ko maiñ ne kyā diyā

jā ke dayār-e-fikr meñ chheḌ diyā junūñ kā saaz

soyā huā shu.ūr thā maiñ ne use jagā diyā

dil kī jabīn-e-shauq par paḌ ga.ī ik hasīñ shikan

maiñ ne ruḳh-e-hayāt se parda jo kal haTā diyā

rāh-e-vafā kī saḳhtiyāñ merī nazar meñ ab nahīñ

maiñ ne har ek gaam par ek chaman khilā diyā

tere gumāñ kī ḳhair ho ban na sakā ḳhudā ḳhudā

mere yaqīn-o-shauq ne but ko ḳhudā banā diyā

tere ruKH-e-sabih ne rang-e-sahar dikha diya

zulmat-e-shab mein bhi mujhe jine ka hausla diya

sehr-e-nazar se aap ke husn-e-bayan mila diya

main ne urus-e-sher ko kitna hasin bana diya

mere junun ki KHak-e-pa surma-e-dida-e-KHirad

mujh se na puchh ham-nafas waqt ko main ne kya diya

ja ke dayar-e-fikr mein chheD diya junun ka saz

soya hua shuur tha main ne use jaga diya

dil ki jabin-e-shauq par paD gai ek hasin shikan

main ne ruKH-e-hayat se parda jo kal haTa diya

rah-e-wafa ki saKHtiyan meri nazar mein ab nahin

main ne har ek gam par ek chaman khila diya

tere guman ki KHair ho ban na saka KHuda KHuda

mere yaqin-o-shauq ne but ko KHuda bana diya