tere shaida bhi hue ishq-e-tamasha bhi hue

tere shaidā bhī hue ishq-e-tamāshā bhī hue

tere dīvāne tire shahr meñ rusvā bhī hue

zulf to zulf hai duniyā se bhī uljhe haiñ ki ham

ik bagūlā bhī bane hāmil-e-sahrā bhī hue

tum to sun paa.e na āvāz-e-shikast-e-dil bhī

kuchh hamīñ the ki harīf-e-ġham-e-duniyā bhī hue

ham faqirān-e-mohabbat ke ajab tevar haiñ

razm-e-ka.aba bhī bane bazm-e-kalīsā bhī hue

miT ke ham ḳhaak hue ḳhāk-e-rah-e-kū-e-butāñ

ban ke ham hāsil-e-sad-bazm-e-tajallī bhī hue

pesh-e-ḳhurshīd-e-ruḳhāñ zarra-e-nāchīz rahe

aur ham rū-kash-e-husn-e-ruḳh-e-zebā bhī hue

zīnat-e-mahfil-e-sad-zohrā-jabīnāñ hue ham

haañ magar ye ki bharī bazm meñ tanhā bhī hue

yuuñ to 'bāqar' bhī rahe ḳhāk-nashīnoñ meñ tire

ye alag baat tire lutf se yaktā bhī hue

tere shaida bhi hue ishq-e-tamasha bhi hue

tere diwane tere shahr mein ruswa bhi hue

zulf to zulf hai duniya se bhi uljhe hain ki hum

ek bagula bhi bane hamil-e-sahra bhi hue

tum to sun pae na aawaz-e-shikast-e-dil bhi

kuchh hamin the ki harif-e-gham-e-duniya bhi hue

hum faqiran-e-mohabbat ke ajab tewar hain

razm-e-kaba bhi bane bazm-e-kalisa bhi hue

miT ke hum KHak hue KHak-e-rah-e-ku-e-butan

ban ke hum hasil-e-sad-bazm-e-tajalli bhi hue

pesh-e-KHurshid-e-ruKHan zarra-e-nachiz rahe

aur hum ru-kash-e-husn-e-ruKH-e-zeba bhi hue

zinat-e-mahfil-e-sad-zohra-jabinan hue hum

han magar ye ki bhari bazm mein tanha bhi hue

yun to 'baqar' bhi rahe KHak-nashinon mein tere

ye alag baat tere lutf se yakta bhi hue