تیرے شیدا بھی ہوئے عشق تماشا بھی ہوئے

تیرے شیدا بھی ہوئے عشق تماشا بھی ہوئے

تیرے دیوانے ترے شہر میں رسوا بھی ہوئے

زلف تو زلف ہے دنیا سے بھی الجھے ہیں کہ ہم

اک بگولا بھی بنے حامل صحرا بھی ہوئے

تم تو سن پائے نہ آواز شکست دل بھی

کچھ ہمیں تھے کہ حریف غم دنیا بھی ہوئے

ہم فقیران محبت کے عجب تیور ہیں

رزم کعبہ بھی بنے بزم کلیسا بھی ہوئے

مٹ کے ہم خاک ہوئے خاک رہ کوئے بتاں

بن کے ہم حاصل‌ صد بزم تجلی بھی ہوئے

پیش خورشید رخاں ذرۂ ناچیز رہے

اور ہم روکش حسن رخ زیبا بھی ہوئے

زینت محفل صد زہرا جبیناں ہوئے ہم

ہاں مگر یہ کہ بھری بزم میں تنہا بھی ہوئے

یوں تو باقرؔ بھی رہے خاک نشینوں میں ترے

یہ الگ بات ترے لطف سے یکتا بھی ہوئے