tere suraj ko teri sham se pahchante hain

tere sūraj ko tirī shaam se pahchānte haiñ

zindagī ham tujhe anjām se pahchānte haiñ

kis qadar dhuup kamātā hai yahāñ koī ise

raunaq-e-mashġhala-e-shām se pahchānte haiñ

ishq vaale to uThāte hī nahīñ apnī nigāh

husn ko husn ke ahkām se pahchānte haiñ

ḳhaas andāz se ḳhat likhtā hai vo parda-nashīñ

ham use nudrat-e-paiġhām se pahchānte haiñ

kaun kartā hai pas-e-parda-e-ā.īna kalām

aks ko hairat-e-ilhām se pahchānte haiñ

saḳht taklīf uThā.ī hai use jānñe meñ

is liye ab use ārām se pahchānte haiñ

sach phaTe haal sā phirtā hai galī-kūchoñ meñ

sach ko aksar isī anjām se pahchānte haiñ

maiñ ne tardīd to bhejī thī pa shaa.e na huī

ahl-e-shahr ab mujhe ilzām se pahchānte haiñ

kaise naqqād haiñ ye itnī baḌī shā.irī ko

bas ri.āyāt se īhām se pahchānte haiñ

'farhat-ehsās' kabhī ghar se nikaltā hī nahīñ

shahr vaale use bas naam se pahchānte haiñ

tere suraj ko teri sham se pahchante hain

zindagi hum tujhe anjam se pahchante hain

kis qadar dhup kamata hai yahan koi ise

raunaq-e-mashghala-e-sham se pahchante hain

ishq wale to uThate hi nahin apni nigah

husn ko husn ke ahkaam se pahchante hain

KHas andaz se KHat likhta hai wo parda-nashin

hum use nudrat-e-paigham se pahchante hain

kaun karta hai pas-e-parda-e-aina kalam

aks ko hairat-e-ilham se pahchante hain

saKHt taklif uThai hai use jaanne mein

is liye ab use aaram se pahchante hain

sach phaTe haal sa phirta hai gali-kuchon mein

sach ko aksar isi anjam se pahchante hain

main ne tardid to bheji thi pa shae na hui

ahl-e-shahr ab mujhe ilzam se pahchante hain

kaise naqqad hain ye itni baDi shairi ko

bas riayat se iham se pahchante hain

'farhat-ehsas' kabhi ghar se nikalta hi nahin

shahr wale use bas nam se pahchante hain