tere tasawwuraat se bachna hai ab muhaal bhi

tere tasavvurāt se bachnā hai ab muhāl bhī

kuchh to hai terī fikr bhī kuchh hai tirā ḳhayāl bhī

ai dost aa ke dekh le ishq kā ye kamāl bhī

tū hī mirā javāb hai tū hī mirā savāl bhī

aa.ī tumhārī yaad jab Dhal ga.ī lamhoñ meñ sadī

aisā lagā ki ruk ga.ī gardish-e-māh-o-sāl bhī

duurī ke bāvajūd bhī Takrā rahī hai saañs ab

aisī judā.ī par karūñ qurbān sad-visāl bhī

koī zamāne meñ nahīñ jis pe ho terā aks bhī

kis se misāl duuñ tirī miltī nahīñ misāl bhī

naaz kabhī na kījiye apne urūj-e-hāl par

ba.ad-e-kamāl ai 'ziyā' aatā hai ik zavāl bhī

tere tasawwuraat se bachna hai ab muhaal bhi

kuchh to hai teri fikr bhi kuchh hai tera KHayal bhi

ai dost aa ke dekh le ishq ka ye kamal bhi

tu hi mera jawab hai tu hi mera sawal bhi

aai tumhaari yaad jab Dhal gai lamhon mein sadi

aisa laga ki ruk gai gardish-e-mah-o-sal bhi

duri ke bawajud bhi Takra rahi hai sans ab

aisi judai par karun qurban sad-visal bhi

koi zamane mein nahin jis pe ho tera aks bhi

kis se misal dun teri milti nahin misal bhi

naz kabhi na kijiye apne uruj-e-haal par

baad-e-kamal ai 'ziya' aata hai ek zawal bhi