tere zaKHmon ki ayaadat nahin karne wale

tere zaḳhmoñ kī ayādat nahīñ karne vaale

ab dikhāve kī mohabbat nahīñ karne vaale

tū ne ye husn jinheñ sauñp diyā hai vo log

terī āñkhoñ kī hifāzat nahīñ karne vaale

ham ko tadbīr se in mushkiloñ meñ Daalā gayā

jab bhī Thānī ki ibādat nahīñ karne vaale

haañ vahī log bane phirte haiñ ab shāh-e-suḳhan

vo jo kahte the mohabbat nahīñ karne vaale

TuuTī dīvār se apnoñ ko mahak aatī hai

is liye ghar kī marammat nahīñ karne vaale

tere zaKHmon ki ayaadat nahin karne wale

ab dikhawe ki mohabbat nahin karne wale

tu ne ye husn jinhen saunp diya hai wo log

teri aankhon ki hifazat nahin karne wale

hum ko tadbir se in mushkilon mein Dala gaya

jab bhi Thani ki ibaadat nahin karne wale

han wahi log bane phirte hain ab shah-e-suKHan

wo jo kahte the mohabbat nahin karne wale

TuTi diwar se apnon ko mahak aati hai

is liye ghar ki marammat nahin karne wale