teri aankhon ki kaifiyyat ko maiKHane se kya nisbat

terī āñkhoñ kī kaifiyyat ko maiḳhāne se kyā nisbat

nigah kī gardishoñ ko daur paimāne se kyā nisbat

ye jiive hijr meñ vo vasl meñ bhī jī nahīñ saktā

takalluf-bar-taraf bulbul ko parvāne se kyā nisbat

ye vo motī haiñ jin kī sīpiyāñ āñkheñ haiñ āshiq kī

mire aañsū ko marvārīd ke daane se kyā nisbat

are dil mat tavaqqo.a dilbaroñ se rakh tarahhum kī

lahū piite haiñ jo shaḳhs un ko ġham khāne se kyā nisbat

gul us kā daaġh hai aur sarv us kā āh-e-mauzūñ hai

'yaqīñ' se nauhagar ko baaġh meñ jaane se kyā nisbat

teri aankhon ki kaifiyyat ko maiKHane se kya nisbat

nigah ki gardishon ko daur paimane se kya nisbat

ye jiwe hijr mein wo wasl mein bhi ji nahin sakta

takalluf-bar-taraf bulbul ko parwane se kya nisbat

ye wo moti hain jin ki sipiyan aankhen hain aashiq ki

mere aansu ko marwarid ke dane se kya nisbat

are dil mat tawaqqoa dilbaron se rakh tarahhum ki

lahu pite hain jo shaKHs un ko gham khane se kya nisbat

gul us ka dagh hai aur sarw us ka aah-e-mauzun hai

'yaqin' se nauhagar ko bagh mein jaane se kya nisbat