teri aankhon se mahakte hue kuchh KHwab chunun

terī āñkhoñ se mahakte hue kuchh ḳhvāb chunūñ

shāḳh-e-mizhgāñ pe khile anjum-o-mahtāb chunūñ

pichhle yāroñ ne bahut ranj diye the mujh ko

ab bahut soch samajh kar na.e ahbāb chunūñ

chāñd ke māthe pe silvaT nahīñ achchhī lagtī

koī tālāb chunūñ be-shikan-e-āb chunūñ

is chunāv meñ mirī jiit bahut mushkil hai

itne lafzoñ meñ ghirā harf-e-ġhazal-yāb chunūñ

mutriba ab vo mirā 'ishq ho yā merī anā

sāz-e-vahshat ke liye āḳhirī mizrāb chunūñ

aisī P.R kamānā mujhe aatā hī nahīñ

saste logoñ ke liye qīmtī alqāb chunūñ

jis ghaḌī saa’d sitāroñ kā milan ho 'yāvar'

vasl-e-jānāñ ko vahī sā’at-e-nāyāb chunūñ

teri aankhon se mahakte hue kuchh KHwab chunun

shaKH-e-mizhgan pe khile anjum-o-mahtab chunun

pichhle yaron ne bahut ranj diye the mujh ko

ab bahut soch samajh kar nae ahbab chunun

chand ke mathe pe silwaT nahin achchhi lagti

koi talab chunun be-shikan-e-ab chunun

is chunaw mein meri jit bahut mushkil hai

itne lafzon mein ghira harf-e-ghazal-yab chunun

mutriba ab wo mera 'ishq ho ya meri ana

saz-e-wahshat ke liye aaKHiri mizrab chunun

aisi PR kamana mujhe aata hi nahin

saste logon ke liye qimti alqab chunun

jis ghaDi sa’d sitaron ka milan ho 'yawar'

wasl-e-jaanan ko wahi sa’at-e-nayab chunun