teri anjuman mein aae tere pyar tak na pahunche

terī anjuman meñ aa.e tire pyaar tak na pahuñche

use kyā kahūñ chaman meñ jo bahār tak na pahuñche

jise aa gayā hai jiinā use mil gayā gulistāñ

vo bahār gul ko tarse ki jo ḳhaar tak na pahuñche

ai muġhannī-e-zamāna tire naġhme ḳhuub lekin

kabhī azmat-e-sadā-e-lab-e-yār tak na pahuñche

vo na pā sake jahāñ meñ kabhī zindagī kā hāsil

jo dayār-e-rañg-o-bū meñ ġham-e-yār tak na pahuñche

koī chal basā jahāñ se yahī kahte kahte āḳhir

tumheñ pās-e-husn itnā ki pukār tak na pahuñche

mujhe har alam gavārā rah-e-ishq meñ hai lekin

kabhī ġham kī dhuup yā-rab mere yaar tak na pahuñche

ye ajiib munsifī hai ye ajiib hai zamāna

jo ḳhatā kare jahāñ meñ vahī daar tak na pahuñche

mire pyaar kī hadoñ meñ hai tamām shai chaman kī

vo lahū bhī kyā lahū hai jo ki ḳhaar tak na pahuñche

teri anjuman mein aae tere pyar tak na pahunche

use kya kahun chaman mein jo bahaar tak na pahunche

jise aa gaya hai jina use mil gaya gulistan

wo bahaar gul ko tarse ki jo KHar tak na pahunche

ai mughanni-e-zamana tere naghme KHub lekin

kabhi azmat-e-sada-e-lab-e-yar tak na pahunche

wo na pa sake jahan mein kabhi zindagi ka hasil

jo dayar-e-rang-o-bu mein gham-e-yar tak na pahunche

koi chal basa jahan se yahi kahte kahte aaKHir

tumhein pas-e-husn itna ki pukar tak na pahunche

mujhe har alam gawara rah-e-ishq mein hai lekin

kabhi gham ki dhup ya-rab mere yar tak na pahunche

ye ajib munsifi hai ye ajib hai zamana

jo KHata kare jahan mein wahi dar tak na pahunche

mere pyar ki hadon mein hai tamam shai chaman ki

wo lahu bhi kya lahu hai jo ki KHar tak na pahunche