teri chahat hi meri zist ka sarmaya hai

terī chāhat hī mirī ziist kā sarmāya hai

ḳhud ko khoyā hai to ab pyaar tirā paayā hai

jis kī ḳhātir mirī āñkhoñ ke diye raushan the

aaj āñgan meñ vo mahtāb utar aayā hai

shab-e-furqat mere ā.īna-e-dil meñ hamdam

tū na aayā to tirā aks ubhar aayā hai

ik na ik din use ehsās-e-nadāmat hogā

be-sabab us ne mire pyaar ko Thukrāyā hai

aur kuchh bhī na diyā jhūTī tasallī ke sivā

mujh ko bachchoñ kī tarah aap ne bahlāyā hai

dasht-e-tanhā.ī meñ qaidī kī tarah huuñ 'zīnat'

maiñ jahāñ huuñ vahāñ hamdard na ham-sāya hai

teri chahat hi meri zist ka sarmaya hai

KHud ko khoya hai to ab pyar tera paya hai

jis ki KHatir meri aankhon ke diye raushan the

aaj aangan mein wo mahtab utar aaya hai

shab-e-furqat mere aaina-e-dil mein hamdam

tu na aaya to tera aks ubhar aaya hai

ek na ek din use ehsas-e-nadamat hoga

be-sabab us ne mere pyar ko Thukraya hai

aur kuchh bhi na diya jhuTi tasalli ke siwa

mujh ko bachchon ki tarah aap ne bahlaya hai

dasht-e-tanhai mein qaidi ki tarah hun 'zinat'

main jahan hun wahan hamdard na ham-saya hai