teri chashm-e-sitam-ijad se Dar lagta hai

terī chashm-e-sitam-ījād se Dar lagtā hai

ye ġhalat hai kisī uftād se Dar lagtā hai

is liye chup huuñ ki ādāb-e-qafas par hai nazar

kaun kahtā hai ki sayyād se Dar lagtā hai

ham to lazzat-kash-e-āzār haiñ ai josh-e-vafā

aur haiñ vo jinheñ bedād se Dar lagtā hai

tere jalvoñ ko kahīñ aam na kar deñ ai dost

is liye mānī-o-bahzād se Dar lagtā hai

kaash vo vaqt na aa.e mirī duniyā meñ kabhī

jab mohabbat kī har uftād se Dar lagtā hai

kahīñ aisā na ho zindāñ bhī bayābāñ ho jaa.e

ishq kī fitrat-e-āzād se Dar lagtā hai

pahle Dar thā ki kahīñ bhuul na jā.ūñ tujh ko

ab ye aalam hai tirī yaad se Dar lagtā hai

na vo ādāb-e-vafā haiñ na vo ādāb-e-junūñ

ai 'mushīr' ab dil-e-nāshād se Dar lagtā hai

teri chashm-e-sitam-ijad se Dar lagta hai

ye ghalat hai kisi uftad se Dar lagta hai

is liye chup hun ki aadab-e-qafas par hai nazar

kaun kahta hai ki sayyaad se Dar lagta hai

hum to lazzat-kash-e-azar hain ai josh-e-wafa

aur hain wo jinhen bedad se Dar lagta hai

tere jalwon ko kahin aam na kar den ai dost

is liye mani-o-bahzad se Dar lagta hai

kash wo waqt na aae meri duniya mein kabhi

jab mohabbat ki har uftad se Dar lagta hai

kahin aisa na ho zindan bhi bayaban ho jae

ishq ki fitrat-e-azad se Dar lagta hai

pahle Dar tha ki kahin bhul na jaun tujh ko

ab ye aalam hai teri yaad se Dar lagta hai

na wo aadab-e-wafa hain na wo aadab-e-junun

ai 'mushir' ab dil-e-nashad se Dar lagta hai