تیری فرقت میں مجھے نیند کہاں آتی ہے

تیری فرقت میں مجھے نیند کہاں آتی ہے

آنکھوں آنکھوں میں ہر اک رات گزر جاتی ہے

اب تو اس طور سے ظالم تری یاد آتی ہے

کہ مجھے ہوش سے بیگانہ بنا جاتی ہے

میں تو ہر وقت تجھے یاد کیا کرتا ہوں

تجھ کو بھولے سے کبھی یاد مری آتی ہے

تیرا ہر ظلم و ستم مجھ کو گوارا ہے مگر

تیری غفلت سے مری جاں پہ بن آتی ہے

اب یہ عالم ہے کہ بے درد زمانے کے ساتھ

اپنی حالت پہ مجھے خود بھی ہنسی آتی ہے

ختم ہوتی ہے شب غم کی کہانی فیاضؔ

شمع بجھتی ہے بس اب صبح ہوئی جاتی ہے