teri furqat mein mujhe nind kahan aati hai

terī furqat meñ mujhe niiñd kahāñ aatī hai

āñkhoñ āñkhoñ meñ har ik raat guzar jaatī hai

ab to is taur se zālim tirī yaad aatī hai

ki mujhe hosh se begāna banā jaatī hai

maiñ to har vaqt tujhe yaad kiyā kartā huuñ

tujh ko bhūle se kabhī yaad mirī aatī hai

terā har zulm-o-sitam mujh ko gavārā hai magar

terī ġhaflat se mirī jaañ pe ban aatī hai

ab ye aalam hai ki bedard zamāne ke saath

apnī hālat pe mujhe ḳhud bhī hañsī aatī hai

ḳhatm hotī hai shab-e-ġham kī kahānī 'fayyāz'

sham.a bujhtī hai bas ab sub.h huī jaatī hai

teri furqat mein mujhe nind kahan aati hai

aankhon aankhon mein har ek raat guzar jati hai

ab to is taur se zalim teri yaad aati hai

ki mujhe hosh se begana bana jati hai

main to har waqt tujhe yaad kiya karta hun

tujh ko bhule se kabhi yaad meri aati hai

tera har zulm-o-sitam mujh ko gawara hai magar

teri ghaflat se meri jaan pe ban aati hai

ab ye aalam hai ki bedard zamane ke sath

apni haalat pe mujhe KHud bhi hansi aati hai

KHatm hoti hai shab-e-gham ki kahani 'fayyaz'

shama bujhti hai bas ab subh hui jati hai