teri gali mein jo mila us se pata puchha tera

terī galī meñ jo milā us se pata pūchhā tirā

sab tujh se the nā-āshnā par sab meñ thā shohrā tirā

koī na thā jab āshnā ham ne kiyā charchā tirā

ai har kisī ke āshnā ab ham se kyā rishta tirā

tū jab huā pīr-e-muġhāñ the sab hī tere mad.h-ḳhvāñ

rah kar ḳhamosh ai ḳhud-nigar ham ne bharam rakkhā tirā

un se ta.alluq qat.a kar jin se huā tū mo'atabar

rakh nā-shanāsoñ par nazar rah jā.egā pardā tirā

auroñ ke naqsh-e-pā pe ham kis tarah se rakhte qadam

lākhoñ nuqūsh-e-pā se thā chhalkā huā jaada tirā

tū kar unhī par saḳhtiyāñ raushan hai jin se terī jaañ

un par hī tū rah mehrbāñ karte haiñ jo saudā tirā

barsoñ se haiñ dīda-varāñ terī galī meñ sargirāñ

sab kuchh dharā rah jā.egā chal de jo banjārā tirā

hai ye hamārā hī lahū ab tak rahā tū surḳh-rū

ham deñ na jis din ḳhūñ-bahā bujh jā.egā chehrā tirā

ai shahr-e-mardum-nā-shanās ai bazm-e-fan-nā-āshnā

sannāTe boleñge yahāñ chhoḌeñ jo ham kūcha tirā

tū munfarid aalam se hai ye sab hamāre dam se hai

mulk-e-suḳhan meñ ham se hī gūñjā huā naġhmā tirā

ho jab tirā qissa raqam aur rok leñ ik ham qalam

kis zikr kis unvān se phir naam aa.egā tirā

teri gali mein jo mila us se pata puchha tera

sab tujh se the na-ashna par sab mein tha shohra tera

koi na tha jab aashna hum ne kiya charcha tera

ai har kisi ke aashna ab hum se kya rishta tera

tu jab hua pir-e-mughan the sab hi tere madh-KHwan

rah kar KHamosh ai KHud-nigar hum ne bharam rakkha tera

un se talluq qata kar jin se hua tu mo'atabar

rakh na-shanason par nazar rah jaega parda tera

auron ke naqsh-e-pa pe hum kis tarah se rakhte qadam

lakhon nuqush-e-pa se tha chhalka hua jada tera

tu kar unhi par saKHtiyan raushan hai jin se teri jaan

un par hi tu rah mehrban karte hain jo sauda tera

barson se hain dida-waran teri gali mein sargiran

sab kuchh dhara rah jaega chal de jo banjara tera

hai ye hamara hi lahu ab tak raha tu surKH-ru

hum den na jis din KHun-baha bujh jaega chehra tera

ai shahr-e-mardum-na-shanas ai bazm-e-fan-na-ashna

sannaTe bolenge yahan chhoDen jo hum kucha tera

tu munfarid aalam se hai ye sab hamare dam se hai

mulk-e-suKHan mein hum se hi gunja hua naghma tera

ho jab tera qissa raqam aur rok len ek hum qalam

kis zikr kis unwan se phir nam aaega tera