تیری گلی میں جو ملا اس سے پتہ پوچھا ترا

تیری گلی میں جو ملا اس سے پتہ پوچھا ترا

سب تجھ سے تھے نا آشنا پر سب میں تھا شہرا ترا

کوئی نہ تھا جب آشنا ہم نے کیا چرچا ترا

اے ہر کسی کے آشنا اب ہم سے کیا رشتہ ترا

تو جب ہوا پیر مغاں تھے سب ہی تیرے مدح خواں

رہ کر خموش اے خود نگر ہم نے بھرم رکھا ترا

ان سے تعلق قطع کر جن سے ہوا تو معتبر

رکھ نا شناسوں پر نظر رہ جائے گا پردا ترا

اوروں کے نقش پا پہ ہم کس طرح سے رکھتے قدم

لاکھوں نقوش پا سے تھا چھلکا ہوا جادہ ترا

تو کر انہی پر سختیاں روشن ہے جن سے تیری جاں

ان پر ہی تو رہ مہرباں کرتے ہیں جو سودا ترا

برسوں سے ہیں دیدہ وراں تیری گلی میں سرگراں

سب کچھ دھرا رہ جائے گا چل دے جو بنجارا ترا

ہے یہ ہمارا ہی لہو اب تک رہا تو سرخ رو

ہم دیں نہ جس دن خوں بہا بجھ جائے گا چہرا ترا

اے شہر مردم نا شناس اے بزم فن نا آشنا

سناٹے بولیں گے یہاں چھوڑیں جو ہم کوچہ ترا

تو منفرد عالم سے ہے یہ سب ہمارے دم سے ہے

ملک سخن میں ہم سے ہی گونجا ہوا نغما ترا

ہو جب ترا قصہ رقم اور روک لیں اک ہم قلم

کس ذکر کس عنوان سے پھر نام آئے گا ترا