teri jafa hui ki jahan ka ghazab hua

terī jafā huī ki jahāñ kā ġhazab huā

ham par to jo sitam bhī huā be-sabab huā

is sā.at-e-sa.īd ko kyā naam dījiye

insāñ asīr-e-vaqt ke zindāñ meñ jab huā

sho.ala-sifat haiñ raqs meñ apne chaman ke phuul

is ālam-e-bahār meñ ye kyā ġhazab huā

shāyad yahī mazāq-e-talab kī hai intihā

duniyā-e-rañg-o-bū meñ bhī dil be-talab huā

munsif ko maslahat kī zabāñ raas aa ga.ī

go faisla huā magar insāf kab huā

us ko nasīb ho na sakā rishta-e-ḳhulūs

jo qā.il-e-qaziya-e-hasab-o-nasab huā

jaarī hai ek tīrgī-o-raushnī kī jañg

jab se shu.ūr-e-silsila-e-roz-o-shab huā

had-e-nigāh tak kahīñ sho.ale kahīñ dhuāñ

ye ḳhāk-o-ḳhūñ kā khel gulistāñ meñ kab huā

is hādse pe aap kā jo tabsira bhī ho

maiñ āshnā-e-mahfil-e-aish-o-tarab huā

kaise ho tum ko lazzat-e-āzād jāñ-nasīb

dushvār marhaloñ se guzarnā hī kab huā

kitne aziim log tah-e-ḳhāk ho ga.e

tū bhī huā jo 'lais' to phir kyā ajab huā

teri jafa hui ki jahan ka ghazab hua

hum par to jo sitam bhi hua be-sabab hua

is saat-e-said ko kya nam dijiye

insan asir-e-waqt ke zindan mein jab hua

shoala-sifat hain raqs mein apne chaman ke phul

is aalam-e-bahaar mein ye kya ghazab hua

shayad yahi mazaq-e-talab ki hai intiha

duniya-e-rang-o-bu mein bhi dil be-talab hua

munsif ko maslahat ki zaban ras aa gai

go faisla hua magar insaf kab hua

us ko nasib ho na saka rishta-e-KHulus

jo qail-e-qaziya-e-hasab-o-nasab hua

jari hai ek tirgi-o-raushni ki jang

jab se shuur-e-silsila-e-roz-o-shab hua

had-e-nigah tak kahin shoale kahin dhuan

ye KHak-o-KHun ka khel gulistan mein kab hua

is hadse pe aap ka jo tabsira bhi ho

main aashna-e-mahfil-e-aish-o-tarab hua

kaise ho tum ko lazzat-e-azad jaan-nasib

dushwar marhalon se guzarna hi kab hua

kitne azim log tah-e-KHak ho gae

tu bhi hua jo 'lais' to phir kya ajab hua