تیری خوں ریز سیاست کا اثر لگتا ہے

تیری خوں ریز سیاست کا اثر لگتا ہے

راہ چلتا ہوں تو ہر گام پہ ڈر لگتا ہے

دشت در دشت پھراتا رہا مجھ کو برسوں

دل آوارہ جو برباد نظر لگتا ہے

وہی سرخی وہی رنگت وہی مانوس مہک

کف گل بھی تو مرا زخم جگر لگتا ہے

آج بھی میری وفا کیش نگاہوں میں تو

زندگی کا کوئی رنگین سفر لگتا ہے

تیری پلکوں پہ لرزتا ہوا ہر قطرۂ اشک

مری پر شوق نگاہوں میں گہر لگتا ہے

اب نہیں آئے گا مشتاقؔ وہ آنے والا

بجھ گئے تارے چلو وقت سحر لگتا ہے