teri KHun-rez siyasat ka asar lagta hai

terī ḳhūñ-rez siyāsat kā asar lagtā hai

raah chaltā huuñ to har gaam pe Dar lagtā hai

dasht-dar-dasht phirātā rahā mujh ko barsoñ

dil-e-āvāra jo barbād-e-nazar lagtā hai

vahī surḳhī vahī rangat vahī mānūs mahak

kaf-e-gul bhī to mirā zaḳhm-e-jigar lagtā hai

aaj bhī merī vafā-kesh nigāhoñ meñ tū

zindagī kā koī rangīn safar lagtā hai

terī palkoñ pe laraztā huā har qatra-e-ashk

mirī pur-shauq nigāhoñ meñ guhar lagtā hai

ab nahīñ aa.egā 'mushtāq' vo aane vaalā

bujh ga.e taare chalo vaqt-e-sahar lagtā hai

teri KHun-rez siyasat ka asar lagta hai

rah chalta hun to har gam pe Dar lagta hai

dasht-dar-dasht phiraata raha mujh ko barson

dil-e-awara jo barbaad-e-nazar lagta hai

wahi surKHi wahi rangat wahi manus mahak

kaf-e-gul bhi to mera zaKHm-e-jigar lagta hai

aaj bhi meri wafa-kesh nigahon mein tu

zindagi ka koi rangin safar lagta hai

teri palkon pe larazta hua har qatra-e-ashk

meri pur-shauq nigahon mein guhar lagta hai

ab nahin aaega 'mushtaq' wo aane wala

bujh gae tare chalo waqt-e-sahar lagta hai