teri mahfil mein jo hum dard ke mare aae

terī mahfil meñ jo ham dard ke maare aa.e

ahl-e-dastār bhī dastār utāre aa.e

kitnī muddat pe mirī jhiil kī vīrānī ga.ī

kitnī muddat pe yahāñ phir se shikāre aa.e

jo sukūñ the vo samundar ne sabhī dhaar liye

aur dariyāoñ ke dāman meñ kināre aa.e

us ne is baar na.ī tarz kī khelī baazī

mere ġham ab ke na.e ruup ko dhāre aa.e

ab udāsī hai na vahshat hai na ġham hai na qazā

saañs aa.e bhī to phir kis ke sahāre aa.e

āḳhirī saañs talak duniyā nahīñ aa.ī samajh

zindagī ke mujhe ab tak na guzāre aa.e

raqs-e-vahshat vo kiyā saarī hadeñ TuuT ga.iiñ

ik zarā dil kī taraf se jo ishāre aa.e

is se baḌh kar nahīñ ho saktā mohabbat kā subūt

sāñs-dar-sāñs faqat aap pe haare aa.e

naf' nuqsān ho 'sādiq' to kareñ bhī tafrīq

apne hisse to ḳhasāre hī ḳhasāre aa.e

teri mahfil mein jo hum dard ke mare aae

ahl-e-dastar bhi dastar utare aae

kitni muddat pe meri jhil ki virani gai

kitni muddat pe yahan phir se shikare aae

jo sukun the wo samundar ne sabhi dhaar liye

aur dariyaon ke daman mein kinare aae

us ne is bar nai tarz ki kheli bazi

mere gham ab ke nae rup ko dhaare aae

ab udasi hai na wahshat hai na gham hai na qaza

sans aae bhi to phir kis ke sahaare aae

aaKHiri sans talak duniya nahin aai samajh

zindagi ke mujhe ab tak na guzare aae

raqs-e-wahshat wo kiya sari haden TuT gain

ek zara dil ki taraf se jo ishaare aae

is se baDh kar nahin ho sakta mohabbat ka subut

sans-dar-sans faqat aap pe haare aae

naf' nuqsan ho 'sadiq' to karen bhi tafriq

apne hisse to KHasare hi KHasare aae