teri mahfil se main kya jata hun

terī mahfil se maiñ kyā jaatā huuñ

dil ke malbe meñ dabā jaatā huuñ

maiñ rafū-gar ke ishāre par huuñ

chāk-dāmāñ huuñ siyā jaatā huuñ

dekh kar mujh ko yuuñ nālāñ mat ho

tū kahe to maiñ chalā jaatā huuñ

tere kūche se guzar hotā hai

aap hī aap rukā jaatā huuñ

jurm kyā hai ye to ma.alūm nahīñ

pas-e-dīvār chunā jaatā huuñ

bhiik māñgī hai mohabbat kī magar

apnī nazroñ meñ girā jaatā huuñ

ahd kartā huuñ bhulāne kā tujhe

phir tirī bātoñ meñ aa jaatā huuñ

maiñ suḳhan terā nahīñ huuñ phir bhī

tere sheroñ meñ paḌhā jaatā huuñ

aarzū chāñd sitāroñ kī hai

āsmānoñ meñ uḌā jaatā huuñ

us ne sāvan kī tamanna kī hai

apnī āñkhoñ se bahā jaatā huuñ maiñ

is qadar raas hai tanhā.ī mujhe

apne saa.e se judā jaatā huuñ

log pāgal to samajhte hoñge

maiñ jo be-vaqt hañsā jaatā huuñ

vo kahīñ aur se detā hai sadā

maiñ kahīñ aur chalā jaatā huuñ

de ke lālach tire ḳhvāboñ kā maiñ

apnī āñkhoñ ko silā jaatā huuñ

ġhair phir ġhair haiñ kyā kiije gila

dhoka apnoñ se hī khā jaatā huuñ

aag ḳhud dil meñ lagā rakkhī hai

apne hāthoñ hī jalā jaatā huuñ

zinda rahne kī vajah sirf hai tū

tere va.adoñ pe jiyā jaatā huuñ

ek dīvār uThāne ke liye

ek dīvār girā jaatā huuñ

toḌā jaatā hai mujhe roz 'fahīm'

roz ta.amīr kiyā jaatā huuñ

teri mahfil se main kya jata hun

dil ke malbe mein daba jata hun

main rafu-gar ke ishaare par hun

chaak-daman hun siya jata hun

dekh kar mujh ko yun nalan mat ho

tu kahe to main chala jata hun

tere kuche se guzar hota hai

aap hi aap ruka jata hun

jurm kya hai ye to malum nahin

pas-e-diwar chuna jata hun

bhik mangi hai mohabbat ki magar

apni nazron mein gira jata hun

ahd karta hun bhulane ka tujhe

phir teri baaton mein aa jata hun

main suKHan tera nahin hun phir bhi

tere sheron mein paDha jata hun

aarzu chand sitaron ki hai

aasmanon mein uDa jata hun

us ne sawan ki tamanna ki hai

apni aankhon se baha jata hun main

is qadar ras hai tanhai mujhe

apne sae se juda jata hun

log pagal to samajhte honge

main jo be-waqt hansa jata hun

wo kahin aur se deta hai sada

main kahin aur chala jata hun

de ke lalach tere KHwabon ka main

apni aankhon ko sila jata hun

ghair phir ghair hain kya kije gila

dhoka apnon se hi kha jata hun

aag KHud dil mein laga rakkhi hai

apne hathon hi jala jata hun

zinda rahne ki wajah sirf hai tu

tere wadon pe jiya jata hun

ek diwar uThane ke liye

ek diwar gira jata hun

toDa jata hai mujhe roz 'fahim'

roz tamir kiya jata hun