teri marzi ke KHad-o-Khaal mein Dhalta hua main

terī marzī ke ḳhad-o-ḳhāl meñ Dhaltā huā maiñ

ḳhaak se aab na ho jā.ūñ pighaltā huā maiñ

ai ḳhizāñ maiñ tujhe ḳhush-rang banā saktā thā

tujh se dekhā na gayā phūltā-phaltā huā maiñ

mujh ko māñgī huī 'izzat nahīñ puurī aatī

TuuT jā.ūñ na ye poshāk badaltā huā maiñ

sho.abda-gar nahīñ mehmān-e-saf-e-yārāñ huuñ

zahr piitā huā aur shahd ugaltā huā maiñ

yam-ba-yam ruuh machaltī huī machhlī kī tarah

dam-ba-dam vaqt ke hāthoñ se phisaltā huā maiñ

ab mirī raakh uḌā yā mujhe āñkhoñ se lagā

tujh talak aa gayā huuñ aag pe chaltā huā maiñ

kah rahī haiñ mujhe vo hausla-afzā āñkheñ

ruuh tak jā.ūñ ḳhad-o-ḳhāl masaltā huā maiñ

ho na ho ek hī tasvīr ke do pahlū haiñ

raqs kartā huā tū aag meñ jaltā huā maiñ

kār-e-darveshī jazā-yāb hai lekin 'shāhid'

ḳhush nahīñ ḳhalvat-e-ḳhālī se bahaltā huā maiñ

teri marzi ke KHad-o-KHal mein Dhalta hua main

KHak se aab na ho jaun pighalta hua main

ai KHizan main tujhe KHush-rang bana sakta tha

tujh se dekha na gaya phulta-phalta hua main

mujh ko mangi hui 'izzat nahin puri aati

TuT jaun na ye poshak badalta hua main

shoabda-gar nahin mehman-e-saf-e-yaran hun

zahr pita hua aur shahd ugalta hua main

yam-ba-yam ruh machalti hui machhli ki tarah

dam-ba-dam waqt ke hathon se phisalta hua main

ab meri rakh uDa ya mujhe aankhon se laga

tujh talak aa gaya hun aag pe chalta hua main

kah rahi hain mujhe wo hausla-afza aankhen

ruh tak jaun KHad-o-KHal masalta hua main

ho na ho ek hi taswir ke do pahlu hain

raqs karta hua tu aag mein jalta hua main

kar-e-darweshi jaza-yab hai lekin 'shahid'

KHush nahin KHalwat-e-KHali se bahalta hua main