teri qurbat mein rahun tera hawala ban jaun

terī qurbat meñ rahūñ terā havāla ban jā.ūñ

tū bane chāñd to maiñ chāñd kā haalā ban jā.ūñ

tū agar qurb se apne mujhe raushan kar de

maiñ bhī ik raushnī-e-‘ālam-e-bālā ban jā.ūñ

tū mire dil meñ rahe husn-e-tamannā ban kar

tū sanam ho mirā maiñ terā shivāla ban jā.ūñ

vasl aisā ho ki phir vasl kī ḳhvāhish na rahe

maiñ sarāpā shab-e-hijrāñ kā izāla ban jā.ūñ

tujh ko in āñkhoñ se dekhūñ to na dekhā jaa.e

de nazar aisī ki maiñ dekhne vaalā ban jā.ūñ

merī rātoñ ko bhī tū dard kī lazzat se navāz

ik kasak aisī ki maiñ jāgne vaalā ban jā.ūñ

liye phirtā huuñ maiñ dil meñ yahī armān 'azīm'

maiñ kisī dil ke añdhere kā ujālā ban jā.ūñ

teri qurbat mein rahun tera hawala ban jaun

tu bane chand to main chand ka haala ban jaun

tu agar qurb se apne mujhe raushan kar de

main bhi ek raushni-e-‘alam-e-baala ban jaun

tu mere dil mein rahe husn-e-tamanna ban kar

tu sanam ho mera main tera shiwala ban jaun

wasl aisa ho ki phir wasl ki KHwahish na rahe

main sarapa shab-e-hijran ka izala ban jaun

tujh ko in aankhon se dekhun to na dekha jae

de nazar aisi ki main dekhne wala ban jaun

meri raaton ko bhi tu dard ki lazzat se nawaz

ek kasak aisi ki main jagne wala ban jaun

liye phirta hun main dil mein yahi arman 'azim'

main kisi dil ke andhere ka ujala ban jaun