تیری رحمت کے سہارے ترے پالے ہوئے لوگ

تیری رحمت کے سہارے ترے پالے ہوئے لوگ

شہر بے مہر میں سازش کے حوالے ہوئے لوگ

تجھ کو اس بات کا اندازہ نہیں ہو سکتا

کیسے جیتے ہیں ترے دل سے نکالے ہوئے لوگ

سب نے مانگا تھا جسے اس کو نہیں مانگا تھا

اور مانگا تھا جسے اس کے ازالے ہوئے لوگ

اسی دریا پہ اداسی کا بدن چومتے ہیں

آخر شب ترے دروازے سے ٹالے ہوئے لوگ

آسمانوں میں اڑا کرتے تھے اتراتے تھے

ایک اک کرکے زمینوں کے نوالے ہوئے لوگ

دکھ بناتے ہیں بنا کر مرے پاس آتے ہیں

اپنے پرکھوں کی روایات سنبھالے ہوئے لوگ

رات دن درد کی دہلیز پہ آتے جاتے

جیتے جی موت کی چوکھٹ کے حوالے ہوئے لوگ