teri rahmat ke sahaare tere pale hue log

terī rahmat ke sahāre tire paale hue log

shahr-e-be-mehr meñ sāzish ke havāle hue log

tujh ko is baat kā andāza nahīñ ho saktā

kaise jiite haiñ tire dil se nikāle hue log

sab ne māñgā thā jise us ko nahīñ māñgā thā

aur māñgā thā jise us ke izāle hue log

isī dariyā pe udāsī kā badan chūmte haiñ

āḳhir-e-shab tire darvāze se Taale hue log

āsmānoñ meñ uḌā karte the itrāte the

ek ik karke zamīnoñ ke nivāle hue log

dukh banāte haiñ banā kar mire paas aate haiñ

apne purkhoñ kī rivāyāt sañbhāle hue log

rāt-din dard kī dahlīz pe āte-jāte

jiite jī maut kī chaukhaT ke havāle hue log

teri rahmat ke sahaare tere pale hue log

shahr-e-be-mehr mein sazish ke hawale hue log

tujh ko is baat ka andaza nahin ho sakta

kaise jite hain tere dil se nikale hue log

sab ne manga tha jise us ko nahin manga tha

aur manga tha jise us ke izale hue log

isi dariya pe udasi ka badan chumte hain

aaKHir-e-shab tere darwaze se Tale hue log

aasmanon mein uDa karte the itraate the

ek ek karke zaminon ke niwale hue log

dukh banate hain bana kar mere pas aate hain

apne purkhon ki riwayat sanbhaale hue log

raat-din dard ki dahliz pe aate-jate

jite ji maut ki chaukhaT ke hawale hue log