teri si bhi aafat koi ai sozish-e-tab hai

terī sī bhī aafat koī ai sozish-e-tab hai

ik aag hai so itnī jalan aag meñ kab hai

maanā ki tum ummīd-e-vafā ke nahīñ qaa.il

phir kyā mire jiine kā koī aur sabab hai

ḳhush huuñ tire kiine se ki shirkat se huuñ mahfūz

jitnā tire dil meñ hai vo mere liye sab hai

hājat nahīñ kuchh aur pas-e-marg magar ek

ya.anī mujhe darkār tirī jumbish-e-lab hai

zinda rahūñ kyuuñ maiñ ki zabāñ un se ho gustāḳh

marne meñ ḳhamoshī hai ḳhamoshī meñ adab hai

ho hijr to phir gor meñ aur ghar meñ hai kyā farq

jo gor kī zulmat hai vahī hijr kī shab hai

iz.hār-e-vafā hai to kis ummīd pe ai 'shauq'

tū dād-talab us se ki bedād-talab hai

teri si bhi aafat koi ai sozish-e-tab hai

ek aag hai so itni jalan aag mein kab hai

mana ki tum ummid-e-wafa ke nahin qail

phir kya mere jine ka koi aur sabab hai

KHush hun tere kine se ki shirkat se hun mahfuz

jitna tere dil mein hai wo mere liye sab hai

hajat nahin kuchh aur pas-e-marg magar ek

yani mujhe darkar teri jumbish-e-lab hai

zinda rahun kyun main ki zaban un se ho gustaKH

marne mein KHamoshi hai KHamoshi mein adab hai

ho hijr to phir gor mein aur ghar mein hai kya farq

jo gor ki zulmat hai wahi hijr ki shab hai

izhaar-e-wafa hai to kis ummid pe ai 'shauq'

tu dad-talab us se ki bedad-talab hai