teri talash teri tamanna to main bhi hun

terī talāsh terī tamannā to maiñ bhī huuñ

jaisā tirā ḳhayāl hai vaisā to maiñ bhī huuñ

ta.amīr jaisī chāhiye vaisī na ho sakī

buniyād apnī roz uThātā to maiñ bhī huuñ

bosīda chhāl peḌ se lipTī hai gar to kyā

achchhe dinoñ kī aas pe zinda to maiñ bhī huuñ

ai zindagī mujhe to ḳhabar tak na ho sakī

har-chand apne ġham kā mudāvā to maiñ bhī huuñ

mahrūmī-e-hayāt kā mujh ko bhī ġham to hai

mahrūmī-e-hayāt pe rotā to maiñ bhī huuñ

shāyad nikal hī aa.e yahāñ koī rāsta

is shahr-e-be-lihāz meñ Thahrā to maiñ bhī huuñ

ai zindagī to kis liye māyūs mujh se hai

terī tavaqquāt pe puurā to maiñ bhī huuñ

nok-e-qalam pe sūrat-e-iz.hār ye bhī hai

tujh ko ġhazal ke ruup meñ likhtā to maiñ bhī huuñ

ai zindagī tū thāmtī mere vajūd ko

tere liye jahān meñ bhaTkā to maiñ bhī huuñ

ai kaash jaan le tū mire dil kī dāstāñ

tum ho to zindagī kā taqāzā to maiñ bhī huuñ

mujh meñ jo iztirāb hai mere sabab se hai

mujh se na kuchh kaho ki samajhtā to maiñ bhī huuñ

ye kyā ki ḳhvāhishoñ kā safar ḳhatm hī na ho

ye kyā ki ek moḌ pe Thahrā to maiñ bhī huuñ

ye kyā ki ek taur se guzregī zindagī

ye kyā ki ek raah pe chaltā to maiñ bhī huuñ

rakhtā nahīñ huuñ dil meñ havāoñ kā kuchh bhī ḳhauf

rāhoñ meñ terī diip jalātā to maiñ bhī huuñ

tum aa.e aur sameT ke duniyā nikal ga.e

is umr ke sarāb meñ bhaTkā to maiñ bhī huuñ

maiñ bhī dukhoñ se māvarā kab huuñ jahān meñ

bār-e-ġham-e-hayāt uThātā to maiñ bhī huuñ

maiñ bhī bhaTak rahā huuñ zamāne ke saath saath

andhā agar jahān hai andhā to maiñ bhī huuñ

tere bayān meñ hai na mere bayān meñ

is zindagī ko dekh dikhātā to maiñ bhī huuñ

kuchh raushnī kī aas hai mujh ko bhī ai 'nabīl'

āñkhoñ ke diip roz jalātā to maiñ bhī huuñ

hañstī hai mujh pe duniyā to hañstī rahe 'nabīl'

is ke muāmlāt pe hañstā to maiñ bhī huuñ

ruk se ga.e 'nabīl' ye kis ke ḳhayāl meñ

tū dekh ġhaur se mujhe ruktā to maiñ bhī huuñ

teri talash teri tamanna to main bhi hun

jaisa tera KHayal hai waisa to main bhi hun

tamir jaisi chahiye waisi na ho saki

buniyaad apni roz uThata to main bhi hun

bosida chhaal peD se lipTi hai gar to kya

achchhe dinon ki aas pe zinda to main bhi hun

ai zindagi mujhe to KHabar tak na ho saki

har-chand apne gham ka mudawa to main bhi hun

mahrumi-e-hayat ka mujh ko bhi gham to hai

mahrumi-e-hayat pe rota to main bhi hun

shayad nikal hi aae yahan koi rasta

is shahr-e-be-lihaz mein Thahra to main bhi hun

ai zindagi to kis liye mayus mujh se hai

teri tawaqquat pe pura to main bhi hun

nok-e-qalam pe surat-e-izhaar ye bhi hai

tujh ko ghazal ke rup mein likhta to main bhi hun

ai zindagi tu thamti mere wajud ko

tere liye jahan mein bhaTka to main bhi hun

ai kash jaan le tu mere dil ki dastan

tum ho to zindagi ka taqaza to main bhi hun

mujh mein jo iztirab hai mere sabab se hai

mujh se na kuchh kaho ki samajhta to main bhi hun

ye kya ki KHwahishon ka safar KHatm hi na ho

ye kya ki ek moD pe Thahra to main bhi hun

ye kya ki ek taur se guzregi zindagi

ye kya ki ek rah pe chalta to main bhi hun

rakhta nahin hun dil mein hawaon ka kuchh bhi KHauf

rahon mein teri dip jalata to main bhi hun

tum aae aur sameT ke duniya nikal gae

is umr ke sarab mein bhaTka to main bhi hun

main bhi dukhon se mawara kab hun jahan mein

bar-e-gham-e-hayat uThata to main bhi hun

main bhi bhaTak raha hun zamane ke sath sath

andha agar jahan hai andha to main bhi hun

tere bayan mein hai na mere bayan mein

is zindagi ko dekh dikhata to main bhi hun

kuchh raushni ki aas hai mujh ko bhi ai 'nabil'

aankhon ke dip roz jalata to main bhi hun

hansti hai mujh pe duniya to hansti rahe 'nabil'

is ke muamlat pe hansta to main bhi hun

ruk se gae 'nabil' ye kis ke KHayal mein

tu dekh ghaur se mujhe rukta to main bhi hun