teri ulfat ki nazar mujh pe jo paiham hogi

terī ulfat kī nazar mujh pe jo paiham hogī

ruuh par ḳhushiyoñ kī barsāt chhamā-chham hogī

dil meñ jo baat hai ik-dūje se khul kar kah deñ

kab talak baat hamārī bhalā mub.ham hogī

qurbateñ ham se baḌhāne kā takalluf na kareñ

aap badleñge to taklīf na phir kam hogī

dil ke sahrā meñ bhī aa jā.egī chupke se bahār

saañs jab un kī mirī saañs meñ mudġham hogī

pyaar ke biij isī aas pe bo.e ham ne

aaj hai ḳhushk magar kal ye zamīñ nam hogī

aap ke aane se duniyā mirī hogī raushan

chāñd tāroñ kī chamak aap hī maddham hogī

ek din aa.egā farhat-bharā mausam 'azkā'

phir mirī āñkhoñ se barsāt bhī kam-kam hogī

teri ulfat ki nazar mujh pe jo paiham hogi

ruh par KHushiyon ki barsat chhama-chham hogi

dil mein jo baat hai ik-duje se khul kar kah den

kab talak baat hamari bhala mubham hogi

qurbaten hum se baDhane ka takalluf na karen

aap badlenge to taklif na phir kam hogi

dil ke sahra mein bhi aa jaegi chupke se bahaar

sans jab un ki meri sans mein mudgham hogi

pyar ke bij isi aas pe boe hum ne

aaj hai KHushk magar kal ye zamin nam hogi

aap ke aane se duniya meri hogi raushan

chand taron ki chamak aap hi maddham hogi

ek din aaega farhat-bhara mausam 'azka'

phir meri aankhon se barsat bhi kam-kam hogi