teri ulfat mein na jaane kya se kya ho jaunga

terī ulfat meñ na jaane kyā se kyā ho jā.ūñgā

tū ne gar chāhā to ik din maiñ ḳhudā ho jā.ūñgā

qatl kar ke mat samajhnā maiñ fanā ho jā.ūñgā

jal ke apnī raakh se phir rūnumā ho jā.ūñgā

maiñ kisī darvesh ke lab kī duā ho jā.ūñgā

be-sahārā zindagī kā aasrā ho jā.ūñgā

rāt-bhar baiThā rahā meñ thaam kar yādoñ kā haath

dil ko ḳhadsha thā ki maiñ tujh se judā ho jā.ūñgā

sāmne Thahrā huuñ tere jaan le pahchān le

chal paḌā to baḌhte baḌhte fāsla ho jā.ūñgā

vaqt ke sahrā meñ tum pāoge mere naqsh-e-pā

maiñ azal se tā-abad ik silsila ho jā.ūñgā

maiñ samā jā.ūñgā ḳhushbū kī tarah har phuul meñ

pattī pattī ġhuncha ġhuncha rūnumā ho jā.ūñgā

raah kā patthar sahī gar tū tarāshegā mujhe

dekhte hī dekhte maiñ devtā ho jā.ūñgā

teri ulfat mein na jaane kya se kya ho jaunga

tu ne gar chaha to ek din main KHuda ho jaunga

qatl kar ke mat samajhna main fana ho jaunga

jal ke apni rakh se phir runuma ho jaunga

main kisi darwesh ke lab ki dua ho jaunga

be-sahaara zindagi ka aasra ho jaunga

raat-bhar baiTha raha mein tham kar yaadon ka hath

dil ko KHadsha tha ki main tujh se juda ho jaunga

samne Thahra hun tere jaan le pahchan le

chal paDa to baDhte baDhte fasla ho jaunga

waqt ke sahra mein tum paoge mere naqsh-e-pa

main azal se ta-abad ek silsila ho jaunga

main sama jaunga KHushbu ki tarah har phul mein

patti patti ghuncha ghuncha runuma ho jaunga

rah ka patthar sahi gar tu tarashega mujhe

dekhte hi dekhte main dewta ho jaunga