teri yaaden mera saya

terī yādeñ merā saaya

saa.e se maiñ bhaag na paayā

mujh ko merī fikr nahīñ hai

mere andar kaun samāyā

rab jaane vo bichhḌā kyūñkar

jis ko maiñ ne miit banāyā

rote saarī 'umr kaTī hai

par na aañkh se aañsū aayā

apnā jīvan ek khilaunā

jis ne chāhā jī bahlāyā

un par koī aañch na aa.ī

ham ne apnā aap jalāyā

un logoñ ne niiñd uḌaa.ī

jin logoñ ne ḳhvāb dikhāyā

mujh se naatā toḌ ke apnā

na jaane vo kyoñ pachhtāyā

yaad kiyā phir us ne mujh ko

vaqt koī jo mushkil aayā

teri yaaden mera saya

sae se main bhag na paya

mujh ko meri fikr nahin hai

mere andar kaun samaya

rab jaane wo bichhDa kyunkar

jis ko main ne mit banaya

rote sari 'umr kaTi hai

par na aankh se aansu aaya

apna jiwan ek khilauna

jis ne chaha ji bahlaya

un par koi aanch na aai

hum ne apna aap jalaya

un logon ne nind uDai

jin logon ne KHwab dikhaya

mujh se nata toD ke apna

na jaane wo kyon pachhtaya

yaad kiya phir us ne mujh ko

waqt koi jo mushkil aaya