teri yaaden sanbhaalti hun main

terī yādeñ sañbhāltī huuñ maiñ

ḳhud ko mushkil meñ Dāltī huuñ maiñ

raat kī malgajī siyāhī se

din kī sūrat ujāltī huuñ maiñ

zindagī naam ke patīle meñ

sirf patthar ubāltī huuñ maiñ

us kī do-Tūk guftugū meñ se

gupt nukte nikāltī huuñ maiñ

sinf-e-āhan banī huuñ mehnat se

ġham ko siise meñ Dhāltī huuñ maiñ

zindagī paas aa hī jaatī hai

jitnā mumkin ho Tāltī huuñ maiñ

ik chamelī ne mujh se pūchh liyā

kis liye saañp pāltī huuñ maiñ

qaaf

zahr Daltā hai kuchh davāoñ meñ

is liye saañp pāltī huuñ maiñ

kam na paḌ jaa.e ġham ḳhushī se kabhī

ye tavāzun sañbhāltī huuñ maiñ

jabki har baar haar jaatī huuñ

phir bhī sikka uchhāltī huuñ maiñ

ik na.ī 'nāziya' se miltī huuñ

ḳhud ko jab bhī khañgāltī huuñ maiñ

teri yaaden sanbhaalti hun main

KHud ko mushkil mein Dalti hun main

raat ki malgaji siyahi se

din ki surat ujalti hun main

zindagi nam ke patile mein

sirf patthar ubaalti hun main

us ki do-Tuk guftugu mein se

gupt nukte nikalti hun main

sinf-e-ahan bani hun mehnat se

gham ko sise mein Dhaalti hun main

zindagi pas aa hi jati hai

jitna mumkin ho Talti hun main

ek chameli ne mujh se puchh liya

kis liye sanp palti hun main

qaf

zahr Dalta hai kuchh dawaon mein

is liye sanp palti hun main

kam na paD jae gham KHushi se kabhi

ye tawazun sanbhaalti hun main

jabki har bar haar jati hun

phir bhi sikka uchhaalti hun main

ek nai 'naziya' se milti hun

KHud ko jab bhi khangalti hun main