تیری یادیں سنبھالتی ہوں میں

تیری یادیں سنبھالتی ہوں میں

خود کو مشکل میں ڈالتی ہوں میں

رات کی ملگجی سیاہی سے

دن کی صورت اجالتی ہوں میں

زندگی نام کے پتیلے میں

صرف پتھر ابالتی ہوں میں

اس کی دو ٹوک گفتگو میں سے

گپت نکتے نکالتی ہوں میں

صنف آہن بنی ہوں محنت سے

غم کو سیسے میں ڈھالتی ہوں میں

زندگی پاس آ ہی جاتی ہے

جتنا ممکن ہو ٹالتی ہوں میں

اک چنبیلی نے مجھ سے پوچھ لیا

کس لیے سانپ پالتی ہوں میں

ق

زہر ڈلتا ہے کچھ دواؤں میں

اس لیے سانپ پالتی ہوں میں

کم نہ پڑ جائے غم خوشی سے کبھی

یہ توازن سنبھالتی ہوں میں

جبکہ ہر بار ہار جاتی ہوں

پھر بھی سکہ اچھالتی ہوں میں

اک نئی نازیہؔ سے ملتی ہوں

خود کو جب بھی کھنگالتی ہوں میں